ଆଦିଲ୍ଲୀ, ୨୫ ଜୁନ୍: ଆଇସିସିର ସଦ୍ୟତମ ଟି-୨୦ ଓ ଦିନିକିଆ ରାଙ୍କିଙ୍ଗରେ ଭାରତୀୟ ଖେଳାଳିମାନଙ୍କର ଚମତ୍କାର ପ୍ରଦର୍ଶନ ଦେଖିବାକୁ ମିଳିଛି। ଭାରତୀୟ ଦଳ ଆୟରଲ୍ୟାଣ୍ଡ ବିପକ୍ଷ ଟି-୨୦ ସିରିଜ୍ ପାଇଁ ପ୍ରସ୍ତୁତ ଥିବାବେଳେ ରାଙ୍କିଙ୍ଗ ତାଲିକାରେ ମଧ୍ୟ ଭାରତର ଦବଦବା ଜାରି ରହିଛି।
ପୁରୁଷ ଟି-୨୦ ବ୍ୟାଟିଂ ରାଙ୍କିଙ୍ଗରେ ଅଭିଷେକ ଶର୍ମା ବିଶ୍ୱର ନମ୍ବର-୧ ବ୍ୟାଟର ଭାବେ ନିଜ ସ୍ଥାନ ସୁଦୃଢ଼ କରିଛନ୍ତି। ତାଙ୍କ ପଛକୁ ଦ୍ୱିତୀୟ ସ୍ଥାନରେ ଅଛନ୍ତି ଇଶାନ କିଶନ। ଏହି ଦୁଇ ଭାରତୀୟ ତାରକାଙ୍କ ମଧ୍ୟରେ ରେଟିଂ ପଏଣ୍ଟର ଅନ୍ତର ବହୁତ କମ୍ ରହିଛି। ପାକିସ୍ତାନର ସାହିବଜାଦା ଫରହାନ ତୃତୀୟ ସ୍ଥାନରେ ଅଛନ୍ତି।
ଟପ୍-୭ ବ୍ୟାଟରଙ୍କ ମଧ୍ୟରେ ଚାରିଜଣ ଭାରତୀୟ ଖେଳାଳି ସ୍ଥାନ ପାଇଥିବା ଭାରତୀୟ କ୍ରିକେଟ ପାଇଁ ବଡ଼ ସଫଳତା। ତିଲକ ବର୍ମା ଷଷ୍ଠ ସ୍ଥାନରେ ଥିବାବେଳେ ସୂର୍ଯ୍ୟକୁମାର ଯାଦବ ସପ୍ତମ ସ୍ଥାନରେ ଅଛନ୍ତି। ବୋଲିଂ ବିଭାଗରେ ମଧ୍ୟ ଭାରତୀୟ ଖେଳାଳିମାନେ ଉଲ୍ଲେଖନୀୟ ସ୍ଥାନ ଅଧିକାର କରିଛନ୍ତି। ବରୁଣ ଚକ୍ରବର୍ତ୍ତୀ ଦ୍ୱିତୀୟ ଓ ଜସପ୍ରୀତ ବୁମ୍ରା ଷଷ୍ଠ ସ୍ଥାନରେ ଅଛନ୍ତି।
ମହିଳା ଟି-୨୦ କ୍ରିକେଟରେ ଭାରତ ପାଇଁ ଆଉ ଏକ ଖୁସି ଖବର ଆସିଛି। ଯୁବ ସ୍ପିନର ଶ୍ରୀଚରଣୀ ଆଇସିସି ଟି-୨୦ ବୋଲିଂ ରାଙ୍କିଙ୍ଗରେ ନମ୍ବର-୧ ସ୍ଥାନ ହାସଲ କରିଛନ୍ତି। ସେ ଇଂଲଣ୍ଡର ଲିନ୍ସେ ସ୍ମିଥଙ୍କୁ ପଛରେ ପକାଇ ଏହି ସଫଳତା ଅର୍ଜନ କରିଛନ୍ତି। ତାଙ୍କ ଏହି କୃତିତ୍ୱ ଭାରତୀୟ ମହିଳା କ୍ରିକେଟ ପାଇଁ ଗର୍ବର ବିଷୟ ହୋଇଛି।
ଏହାଛଡ଼ା ଦିନିକିଆ ରାଙ୍କିଙ୍ଗରେ ମଧ୍ୟ ଭାରତୀୟ ଖେଳାଳିଙ୍କ ସ୍ଥିତି ମଜବୁତ ରହିଛି। ଶୁଭମନ ଗିଲ ଗୋଟିଏ ସ୍ଥାନ ଉପରକୁ ଉଠି ଦ୍ୱିତୀୟ ସ୍ଥାନରେ ପହଞ୍ଚିଛନ୍ତି। ବିରାଟ କୋହଲି ତୃତୀୟ ଓ ରୋହିତ ଶର୍ମା ଚତୁର୍ଥ ସ୍ଥାନରେ ଅଛନ୍ତି। ବୋଲିଂ ରାଙ୍କିଙ୍ଗରେ କୁଲଦୀପ ଯାଦବ ଶୀର୍ଷ-୧୦ ମଧ୍ୟରେ ସ୍ଥାନ ବଜାୟ ରଖିଛନ୍ତି।
ଆଗାମୀ ଆୟରଲ୍ୟାଣ୍ଡ ଓ ଇଂଲଣ୍ଡ ସିରିଜରେ ଭାରତୀୟ ଖେଳାଳିମାନେ ନିଜର ଏହି ଫର୍ମ ଜାରି ରଖିବେ ବୋଲି କ୍ରିକେଟ ପ୍ରେମୀମାନେ ଆଶା ରଖିଛନ୍ତି।